پنجاب کے مختلف اضلاع میں بارشوں کا الرٹ،7 اکتوبر تک بارش کا امکان

 

لاہور: پنجاب ڈیزاسٹر مینجمنٹ اتھارٹی (پی ڈی ایم اے) نے پیشگوئی کی ہے کہ آج رات سے 7 اکتوبر تک صوبے کے بیشتر اضلاع میں بارشیں متوقع ہیں۔

ترجمان پی ڈی ایم اے کے مطابق مغربی ہواؤں کے داخل ہونے سے راولپنڈی، مری، اٹک، چکوال، جہلم اور منڈی بہاوالدین میں بارش کا امکان ہے۔ اسی طرح گجرات، گوجرانوالہ، حافظ آباد، وزیرآباد، قصور، شیخوپورہ، سیالکوٹ، نارووال، میانوالی، خوشاب، سرگودھا، جھنگ، ننکانہ اور ٹوبہ ٹیک سنگھ میں بھی بارش متوقع ہے۔

مزید بتایا گیا ہے کہ 6 اکتوبر تک ڈیرہ غازی خان، بھکر، لیہ اور ملتان میں گرج چمک کے ساتھ بارش ہو سکتی ہے، جب کہ بہاولپور، بہاولنگر، راجن پور، رحیم یار خان، مری اور راولپنڈی میں بارش کے باعث ندی نالوں میں پانی کے بہاؤ میں اضافے کا خدشہ ہے۔

پی ڈی ایم اے نے متعلقہ اداروں کو الرٹ رہنے اور کسی بھی ہنگامی صورتحال سے نمٹنے کے لیے تیاری رکھنے کی ہدایت کی ہے۔