نئی دہلی اسٹیڈیم میں آوارہ کتوں کے حملے،کینیا اور جاپان کے کوچز زخمی

نئی دہلی:بھارت میں جاری ورلڈ پیرا ایتھلیٹکس چیمپئن شپ کے دوران جواہر لال نہرو اسٹیڈیم میں آوارہ کتوں کے حملے سے کینیا اور جاپان کے کوچز زخمی ہوگئے۔

رپورٹس کے مطابق مختلف واقعات میں آوارہ کتوں نے کینیا کے کوچ ڈینیس موانزو اور جاپان کے اسسٹنٹ کوچ میکو اوتوماستو پر حملہ کیا، جس سے دونوں زخمی ہوگئے۔ زخمی کوچز کو فوری طور پر اسپتال منتقل کیا گیا جہاں انہیں ابتدائی طبی امداد دی گئی۔

بھارتی میڈیا کے مطابق یہ چیمپئن شپ کے آغاز سے اب تک کتوں کے حملے کا پانچواں واقعہ ہے۔ اس سے قبل ایک سیکیورٹی گارڈ اور دو بھارتی شہری بھی اسی طرح کے واقعات میں زخمی ہو چکے ہیں۔ بتایا گیا ہے کہ اسٹیڈیم میں 30 منٹ کے اندر تین حملے پیش آئے۔

رپورٹس کے مطابق کینیا کے کوچ کی ٹانگ سے خون بہنے لگا تھا جبکہ جاپانی کوچ کو معمولی چوٹیں آئیں۔ ان واقعات کے بعد منتظمین کو سخت تنقید کا سامنا ہے اور ایونٹ کی سیکیورٹی پر سوالات اٹھ گئے ہیں۔

واضح رہے کہ ورلڈ پیرا ایتھلیٹکس چیمپئن شپ کے مقابلے ان دنوں نئی دہلی کے جواہر لال نہرو اسٹیڈیم میں جاری ہیں۔