قطر اور مصر کا حماس کے بیان کا خیر مقدم

غزہ میں جنگ بندی کے لیے ثالثی کردار ادا کرنے والے قطر اور مصر نے امریکی صدر ڈونلڈ ٹرمپ کے امن منصوبے پر حماس کے بیان کا خیر مقدم کیا ہے۔

قطری وزارتِ خارجہ کے مطابق وہ حماس کی جانب سے یرغمالیوں کی رہائی پر آمادگی ظاہر کرنے کے فیصلے کو مثبت پیش رفت سمجھتے ہیں۔ ترجمان نے کہا کہ قطر صدر ٹرمپ کے فوری جنگ بندی کے مطالبے کی بھی حمایت کرتا ہے تاکہ غزہ میں خونریزی کا خاتمہ اور یرغمالیوں کی محفوظ رہائی ممکن ہو سکے۔

بیان میں مزید کہا گیا کہ غزہ جنگ کے خاتمے کے لیے جاری منصوبے پر پیش رفت کے سلسلے میں قطر نے مصر اور امریکا سے رابطے تیز کر دیے ہیں۔

دوسری جانب مصر کی وزارتِ خارجہ نے امید ظاہر کی ہے کہ حماس کے ردِعمل کے بعد امن عمل میں مثبت نتائج سامنے آئیں گے۔ وزارت نے کہا کہ عرب ممالک، امریکا اور یورپی اتحادیوں کے ساتھ مل کر غزہ میں مستقل جنگ بندی کے لیے تمام کوششیں جاری رہیں گی۔

اقوامِ متحدہ کے سیکرٹری جنرل انتونیو گوتریس نے بھی ٹرمپ پلان پر حماس کے جواب کو حوصلہ افزا قرار دیتے ہوئے زور دیا کہ تمام فریقین اس موقع سے فائدہ اٹھائیں تاکہ غزہ میں جنگ کا خاتمہ ممکن ہو سکے۔