اشتہاری ملزم طیفی بٹ دبئی سے گرفتار

دبئی(امت نیوز) لاہور میں ٹیپو ٹرکاں والے کے بیٹے امیر بالاج ٹیپو کے قتل کیس میں نامزد مرکزی اشتہاری ملزم خواجہ تعریف بٹ عرف طیفی بٹ کو دبئی سے گرفتار کرلیا گیا ہے۔ یہ گرفتاری انٹرپول کی مدد سے عمل میں آئی، جس کے بعد اسے قانونی کارروائی کی تکمیل کے بعد پاکستان منتقل کیا جائے گا۔

امیر بالاج ٹیپو کو 18 فروری 2024 کو لاہور کے علاقے ٹھوکر نیاز بیگ کے قریب ایک شادی کی تقریب میں فائرنگ کرکے قتل کردیا گیا تھا۔ پولیس کے مطابق امیر بالاج ٹیپو سابق ڈی ایس پی اکبر اقبال بلا کے بیٹے کی شادی میں شریک تھا جب اچانک ایک حملہ آور نے فائرنگ کردی۔ اس حملے میں امیر بالاج سمیت تین افراد زخمی ہوئے، جنہیں اسپتال منتقل کیا گیا، تاہم امیر بالاج زخموں کی تاب نہ لاتے ہوئے جاں بحق ہوگیا۔ مقتول کے محافظوں کی فائرنگ سے حملہ آور بھی موقع پر مارا گیا تھا۔

اگست 2024 میں اس کیس کے مرکزی ملزم احسن شاہ کو پولیس نے نشاندہی کے لیے لے جایا تو مبینہ مقابلے کے دوران اپنے ساتھیوں کی فائرنگ سے زخمی ہوگیا اور ہسپتال میں دم توڑ گیا۔ پولیس کے مطابق احسن شاہ کو چھڑوانے کے لیے اس کے بھائی اور دیگر افراد نے حملہ کیا تھا۔

ستمبر 2025 میں مشترکہ تحقیقاتی ٹیم (جے آئی ٹی) کی رپورٹ میں انکشاف ہوا تھا کہ خواجہ عقیل عرف گوگی بٹ نے امیر بالاج ٹیپو کو قتل کروانے کی منصوبہ بندی کی تھی۔ جے آئی ٹی ذرائع کے مطابق گوگی بٹ اس سلسلے میں طیفی بٹ کے ساتھ رابطے میں رہا، جبکہ وہ ٹیپو خاندان کے دیگر قتل کیسز میں بھی نامزد رہا ہے۔ جے آئی ٹی نے اشارہ دیا ہے کہ آئندہ پیشی پر گوگی بٹ کی ضمانت منسوخ کروانے کی درخواست دی جائے گی۔

امیر بالاج کے قتل کے بعد گوگی بٹ فرار ہوگیا تھا، تاہم بعدازاں اس نے ضمانت حاصل کرلی اور اس وقت تک 15 ستمبر 2025 تک عبوری ضمانت پر رہا۔ دوسری جانب طیفی بٹ تاحال اشتہاری ملزم تھا، جسے اب دبئی سے حراست میں لے کر پاکستان لانے پر کام شروع کر دیا گیا ہے۔