گلوبل صمود فلوٹیلا کے گرفتار کارکنان نے اسرائیلی وزیر کے سامنے بلند نعرے لگادیے

غزہ: غزہ کے لیے امدادی سامان لے جانے والے ’’گلوبل صمود فلوٹیلا‘‘ کے گرفتار کارکنان نے اسرائیل کے قومی سلامتی وزیر اتمر بن گویر کے سامنے فلسطین کے حق میں بلند نعرے لگا دیے، جس سے موقع پر موجود سکیورٹی اہلکار بھی حیران رہ گئے۔

عرب میڈیا کے مطابق، بن گویر ایک حراستی مرکز کے دورے پر پہنچے جہاں غزہ کے قریب بین الاقوامی پانیوں سے گرفتار کیے گئے غیر ملکی کارکنان کو رکھا گیا تھا۔ یہ کارکنان مختلف ممالک سے تعلق رکھتے ہیں اور وہ اسرائیلی محاصرے میں گھرے غزہ کے شہریوں کے لیے انسانی امداد پہنچانے کے مشن پر روانہ ہوئے تھے۔

رپورٹس کے مطابق، بن گویر نے قیدیوں کے سامنے اشتعال انگیز رویہ اپنایا اور ان پر طنز کرتے ہوئے انہیں ’’دہشت گرد‘‘ قرار دیا۔ تاہم کارکنان نے بلند آواز میں ’’فلسطین زندہ باد‘‘ اور ’’غزہ کو آزادی دو‘‘ کے نعرے لگائے، جس پر اسرائیلی وزیر وہاں سے چلے گئے۔

عرب میڈیا کے مطابق، اسرائیلی حکام نے فلوٹیلا کے متعدد جہازوں کو بین الاقوامی پانیوں میں روکا، حالانکہ بین الاقوامی قانون کے تحت انسانی امداد لے جانے والے جہازوں پر اس طرح کی کارروائی غیر قانونی سمجھی جاتی ہے۔

یہ پہلا موقع نہیں کہ اسرائیل نے غزہ کے لیے امدادی قافلوں کو روکا ہو۔ 2010 میں ’’مرمرہ فلوٹیلا‘‘ پر اسرائیلی فورسز کے حملے میں 10 کارکنان جاں بحق ہوئے تھے، جس کے بعد عالمی سطح پر اسرائیل پر شدید تنقید ہوئی تھی۔