سنو نیوز نے کے پی سی سپر 6 کرکٹ ٹورنامنٹ جیت لیا

کراچی پریس کلب کے زیراہتمام منعقدہ کے پی سی سپر 6 کرکٹ ٹورنامنٹ شاندار انداز میں اختتام پذیر ہو گیا،فائنل سنو نیوز نے سنسنی خیز مقابلے کے بعد ڈان نیوز کو شکست دے کر جیت لیا۔

فائنل میچ ہفتہ اور اتوارکی شب کراچی پریس کلب میں کھیلا گیا، جس میں دونوں ٹیموں نے خوبصورت انداز میں کھیل پیش کیا۔ ڈان نیوز نے سیمی فائنل میں دفاعی چیمپئن روزنامہ جنگ کو شکست دے کر فائنل میں جگہ بنائی، جبکہ سنو نیوز نے پورے ٹورنامنٹ میں مسلسل عمدہ کارکردگی دکھاتے ہوئے ٹائٹل اپنے نام کیا۔

ٹورنامنٹ میں نیشنل اور انٹرنیشنل میڈیا اداروں کی 32 ٹیموں نے حصہ لیا۔ تمام مقابلے ناک آؤٹ سسٹم رولز کے تحت کھیلے گئے۔ شفافیت اور معیار کو برقرار رکھنے کے لیے تربیت یافتہ غیر جانب دار امپائرز کی خدمات حاصل کی گئیں۔

کراچی پریس کلب کے صدر فاضل جمیلی نے فائنل کے موقع پر کھلاڑیوں کو مبارکباد دیتے ہوئے کہاکہ یہ ٹورنامنٹ نہ صرف کھیلوں کے فروغ کا ذریعہ ہے بلکہ صحافتی برادری میں باہمی روابط اور مثبت سرگرمیوں کو بڑھانے کا ایک خوبصورت موقع فراہم کرتا ہے۔ سنو نیوز اور ڈان نیوز نے بہترین کھیل کا مظاہرہ کیا اور دیگر ٹیموں نے بھی کھیل کے جذبے کے ساتھ حصہ لیا، جو قابلِ تحسین ہے –

کراچی پریس کلب کے سیکریٹری سہیل افضل خان نے کہاکہ ہمیں خوشی ہے کہ پریس کلب کے پلیٹ فارم سے اس نوعیت کی صحت مند سرگرمیاں کامیابی سے جاری ہیں۔ اس سال ٹیموں کی کارکردگی پہلے سے بہتر رہی اور فائنل میچ نے شائقین کو آخر لمحے تک جوڑے رکھا۔ پریس کلب مستقبل میں بھی کھیلوں کی سرگرمیوں کو فروغ دیتا رہے گا-سنو نیوز کے کپتان زاہد غفار نے فتح پر خوشی کا اظہار کرتے ہوئے کہا کہ ٹیم نے پورے ٹورنامنٹ میں محنت اور اتحاد کے ساتھ کھیل پیش کیا۔ہمارے لیے یہ اعزاز کی بات ہے کہ ہم نے پریس کلب جیسے معزز ادارے کے ٹورنامنٹ میں کامیابی حاصل کی ۔ تمام ٹیموں نے بہترین اسپورٹس مین اسپرٹ دکھائی-

ڈان نیوز کے کپتان نے کہاکہ اگرچہ ہم فائنل جیت نہ سکے، لیکن ٹیم کی کارکردگی اور جذبہ زبردست رہا۔ یہ ٹورنامنٹ سب کے لیے ایک مثبت تجربہ تھا۔فائنل میچ کے دوران پریس کلب کے اراکین اور شائقین بڑی تعداد میں موجود رہے۔ کئی اراکین نے ٹورنامنٹ کے آرگنائزر اور جوائنٹ سیکرٹری پریس کلب محمد منصف کو خراج تحسین پیش کرتے ہوئے کہا کہ اس سال کے مقابلے پچھلے برسوں کی نسبت زیادہ دلچسپ اور سنسنی خیز رہے۔ہم نے شاندار بیٹنگ، عمدہ بولنگ اور بہترین فیلڈنگ دیکھی۔ صحافی برادری کا اس انداز میں کھیلوں میں حصہ لینا خوش آئند ہے-

فائنل میچ میں جنید شاہ کو غیر معمولی کارکردگی پر مین آف دی میچ قرار دیا گیاجبکہ ٹورنامنٹ میں نمایاں کارکردگی دکھانے والے بیٹس مین، بالرز اور فیلڈرز کے لیے خصوصی نقد انعامات کا اعلان کیا گیا۔ انعامات دینے کی تقریب جلد کراچی پریس کلب میں منعقد کی جائے گی۔پورے ٹورنامنٹ میں دوستانہ ماحول، کھیل کا جذبہ اور صحافتی برادری کا اتحاد نمایاں نظر آیا۔

واضع رہے ٹورنامنٹ کے تمام میچز 3 ، 4 اکتوبر جمعہ اور ہفتے کی رات میں کھیلے گئے۔دلچسپ اور سنسنی خیز مقابلوں کو دیکھنے کے لئے اراکین پریس کلب کی بڑی تعداد آخر تک موجود رہی۔