کوالالمپور:وزیراعظم شہباز شریف کے اعزاز میں شاندار استقبالیہ،گارڈ آف آنر پیش

کوالالمپور میں وزیراعظم پاکستان شہباز شریف کے اعزاز میں باضابطہ استقبالیہ تقریب منعقد کی گئی۔

وزیراعظم شہباز شریف ملائیشیا کے وزیراعظم انور ابراہیم کے دفتر پہنچے تو میزبان وزیراعظم نے پرتپاک استقبال کیا۔ دونوں رہنماؤں نے مصافحہ اور گلے مل کر خیرمقدم کیا۔

اس موقع پر ملائیشیا کی مسلح افواج کے دستے نے وزیراعظم پاکستان کو گارڈ آف آنر پیش کیا، بعد ازاں دونوں ممالک کے قومی ترانے بجائے گئے۔ وزیراعظم شہباز شریف نے ملائیشین وزراء اور حکام سے بھی ملاقات کی۔

وزیراعظم کی ملائیشیا کے ہم منصب انور ابراہیم سے تفصیلی ملاقات آج متوقع ہے۔ ملاقات میں تجارت، سرمایہ کاری، تعلیم، توانائی، آئی ٹی اور ڈیجیٹل معیشت کے شعبوں میں تعاون بڑھانے پر گفتگو ہوگی۔ دونوں ممالک کے درمیان وفود کی سطح پر بات چیت اور مختلف معاہدوں پر دستخط بھی متوقع ہیں۔

واضح رہے کہ وزیراعظم شہباز شریف گزشتہ رات سرکاری دورے پر کوالالمپور پہنچے، جہاں ملائیشیا کے وزیر اطلاعات و کمیونیکیشنز فہمی فاضل، پاکستانی ہائی کمشنر سید احسن رضا شاہ اور سفارتی عملے نے ان کا خیرمقدم کیا۔

بعدازاں وزیراعظم کی رہائش گاہ پر ملائیشیا کے وزیراعظم انور ابراہیم نے ایک مرتبہ پھر گرمجوشی سے ملاقات کی۔ شہباز شریف نے پرتپاک استقبال پر شکریہ ادا کرتے ہوئے کہا کہ انہیں ملائیشیا آ کر خوشی ہوئی اور یہ دورہ دونوں ممالک کے تعلقات کو مزید مضبوط کرے گا۔

وزیراعظم کے ہمراہ نائب وزیراعظم و وزیر خارجہ اسحاق ڈار، وزیر اطلاعات عطا اللہ تارڑ اور معاون خصوصی طارق فاطمی بھی موجود ہیں۔