دنیا کی ابھرتی معیشتوں میں پاکستان دوسرا نمبر حاصل کرنے میں کامیاب

کراچی: امریکی مالیاتی جریدے بلوم برگ کے مطابق پاکستان ان چند ممالک میں شامل ہے جن کے دیوالیہ ہونے کے امکانات میں نمایاں کمی ریکارڈ کی گئی ہے۔

بلوم برگ کی تازہ رپورٹ میں کہا گیا ہے کہ گزشتہ 15 ماہ (جون 2024 سے ستمبر 2025) کے دوران پاکستان کی معاشی صورتحال میں مسلسل بہتری دیکھی گئی، اور ملک کے دیوالیہ ہونے کے خدشات میں 2200 پوائنٹس تک کمی واقع ہوئی ہے، جو پاکستان کی معیشت کے استحکام کی علامت ہے۔

رپورٹ کے مطابق ابھرتی ہوئی معیشتوں میں کارکردگی کے لحاظ سے پاکستان دنیا بھر میں دوسرے نمبر پر رہا، جبکہ اس فہرست میں ترکیہ پہلے نمبر پر ہے۔

بلوم برگ نے بتایا کہ پاکستان کی کارکردگی کے برعکس مصر، نائیجیریا اور ارجنٹائن جیسے ممالک میں معاشی خطرات میں اضافہ ہوا، جبکہ جنوبی افریقہ اور ایل سلواڈور میں بہتری کی رفتار سست رہی۔

رپورٹ میں مزید کہا گیا کہ پاکستان کے لیے یہ پیش رفت سرمایہ کاروں کے بڑھتے اعتماد اور پائیدار مالی استحکام کی واضح علامت ہے۔