افغانستان کی صورتحال پر چارممالک کا غیر معمولی اجلاس آج روس میں ہوگا

روس میں آج افغانستان کے معاملے پر پاکستان، ایران، روس اور چین کے نمائندوں کا غیر معمولی اجلاس ہوگا۔ پاکستان کی نمائندگی اس اجلاس میں نمائندہ خصوصی برائے افغانستان محمد صادق خان کریں گے۔ اجلاس میں افغانستان کی صورتحال، علاقائی سکیورٹی اور انسداد دہشت گردی کے امور پر بات چیت ہوگی۔

اجلاس میں چاروں ممالک افغانستان میں کسی بھی بیرونی غیر ملکی فوجی اڈے کے قیام کی مخالفت کی تجدید کریں گے۔ اس کے علاوہ 1988 کے پابندیوں کے نظام میں زمینی حقائق کے مطابق ایڈجسٹمنٹ کی ضرورت پر بھی زور دیا جائے گا۔

محمد صادق خان اجلاس میں افغانستان سے کالعدم دہشت گرد گروہوں کے خاتمے، ان کی بھرتیوں، اسلحہ فراہمی اور فنڈنگ کی روک تھام کے معاملات بھی اٹھائیں گے۔ پاکستان خاص طور پر افغانستان میں کالعدم بی ایل اے، ٹی ٹی پی اور جیش العدل کی محفوظ پناہ گاہوں، تربیتی مراکز اور انفراسٹرکچر کے خاتمے پر زور دے گا۔

چاروں ممالک باہمی علاقائی منسلکی، انسداد منشیات، انسداد اسمگلنگ اور ترقیاتی منصوبوں پر بھی بات کریں گے۔ اجلاس میں انسانی حقوق، بالخصوص خواتین اور بچوں کے حقوق، لڑکیوں کی تعلیم اور روزگار پر بھی زور دیا جائے گا۔

مزید برآں، پاکستان، روس، چین اور ایران افغانستان میں جامع اور وسیع البنیاد حکومت کے قیام اور افغان مہاجرین کی باعزت واپسی کے حوالے سے بھی بات کریں گے۔ اجلاس میں افغانستان کے منجمد بین الاقوامی اثاثہ جات کی بحالی اور افغان حکومت کے ساتھ سفارتی تعلقات کی بہتری پر بھی بات چیت ہوگی۔