کراچی :دودھ 300 روپے فی لیٹر ہونے کا خدشہ، شہری پریشان

کراچی میں مہنگائی سے ستائے عوام کے لیے ایک اور بری خبر، ڈیری فارمرز نے دودھ کی قیمت میں 50 روپے فی لیٹر اضافے کا مطالبہ کرتے ہوئے11 اکتوبر سے قیمت 300 روپے فی لیٹر تک فروخت کرنے کی دھمکی دے دی ہے۔

کمشنر ہاؤس کراچی میں دودھ کی قیمتوں پر ہونے والا اجلاس بے نتیجہ ختم ہوگیا۔ اجلاس میں ڈیری فارمرز، ہول سیلرز اور ریٹیلرز نے حکومت سے فوری طور پر نئی قیمتوں کا نوٹیفکیشن جاری کرنے کا مطالبہ کیا۔

ڈیری فارمرز ایسوسی ایشن کے مطابق حالیہ سیلاب نے ڈیری سیکٹر کو شدید نقصان پہنچایا ہے جس کی وجہ سے پیداواری لاگت میں 30 فیصد اضافہ ہوا۔ فارمرز کا کہنا ہے کہ وہ روزانہ تقریباً 3 ارب روپے کا نقصان برداشت کر رہے ہیں۔

ایسوسی ایشن نے خبردار کیا ہے کہ اگر حکومت نے مطالبات نہ مانے تو وہ وزیراعلیٰ ہاؤس کے باہر احتجاج کریں گے اور دودھ کی قیمت 220 روپے سے بڑھا کر براہِ راست 300 روپے فی لیٹر مقرر کر دیں گے۔

دوسری جانب کراچی کے شہری اس ممکنہ اضافے سے سخت پریشان ہیں۔ ان کا کہنا ہے کہ اگر دودھ 300 روپے لیٹر ہوگیا تو بچوں کو دودھ کے بجائے پانی پلانا پڑے گا۔