8اکتوبر زلزلہ:قوم نے مصیبتوں کو عزم و ایمان سے شکست دی، صدر زرداری

اسلام آباد (نیوز ڈیسک) — صدرِ مملکت آصف علی زرداری نے قومی یومِ استقامت کے موقع پر اپنے پیغام میں کہا ہے کہ 8 اکتوبر 2005 کا زلزلہ ہمیں اُس دن کی یاد دلاتا ہے جب پوری قوم نے عزم، اتحاد اور ایمان کے ساتھ تباہ کن قدرتی آفات کا مقابلہ کیا۔

صدر زرداری نے کہا کہ زلزلے کی بیسویں برسی کے موقع پر پاکستان ایک زیادہ مضبوط، متحد اور پُرعزم قوم کے طور پر تابناک مستقبل کی تعمیر کی جانب گامزن ہے۔

ان کا کہنا تھا کہ اصل طاقت مشکلات سے بچنے میں نہیں بلکہ اُنہیں حوصلے، ایمان اور جدت کے ساتھ عبور کرنے میں ہے۔”

صدر نے مزید کہا کہ اسی سال ملک نے ایک اور تباہ کن مون سون سیلاب کا سامنا کیا، جس کے نتیجے میں بے شمار لوگ بے گھر ہوئے جبکہ زراعت، بنیادی ڈھانچے اور روزگار کے شعبوں کو بھاری نقصان پہنچا۔

انہوں نے بتایا کہ پاکستان کا ڈیزاسٹر مینجمنٹ فریم ورک اب عالمی سطح پر ایک مؤثر ماڈل کے طور پر تسلیم کیا جا رہا ہے، تاہم بار بار آنے والی قدرتی آفات اس بات کا تقاضا کرتی ہیں کہ تیاری اور پائیدار ترقی کے عمل کو مزید مستحکم کیا جائے۔

صدرِ مملکت نے تمام اداروں اور اسٹیک ہولڈرز پر زور دیا کہ وہ باہمی تعاون کے ساتھ قدرتی آفات کے اثرات کو کم کرنے، مشترکہ تیاری کو فروغ دینے اور ضرورت مندوں کے تحفظ کے لیے اپنا کردار ادا کریں۔