اورکزئی میں سکیورٹی فورسز کا آپریشن، لیفٹیننٹ کرنل سمیت 11 جوان شہید، 19 دہشتگرد ہلاک

اورکزئی: سکیورٹی فورسز نے 7 اور 8 اکتوبر کی درمیانی شب انٹیلی جنس بنیادوں پر دہشتگردوں کے خلاف آپریشن کیا جس میں لیفٹینٹ کرنل جنید طارق شہید سمیت 11 جوانوں نے وطن پر قربانیاں دیں۔

پاک فوج کے شعبہ تعلقات عامہ (آئی ایس پی آر) کے مطابق یہ گروہ بھارت کی پراکسی کے طور پر پاکستان میں دہشت گردی کی کارروائیوں میں ملوث تھا، آپریشن کے دوران دہشت گردوں نے شدید فائرنگ کی جس کے نتیجے میں  لیفٹینٹ کرنل جنید طارق شہید، میجر طیّب راحت سمیت 9 جوان جام شہادت نوش کر گئے۔

شعبہ تعلقات عامہ کا کہنا ہے کہ لیفٹینٹ کرنل جنید طارق شہید ٹیم کی قیادت کر رہے تھے، شہید ہونے والے دیگر 9 جوانوں میں نائب صوبیدار اعظم گل، نائیک عدیل حسین، نائیک گل امیر شامل ہیں، اس کے علاوہ لانس نائیک شیر خان، لانس نائیک طالش فراز، لانس نائیک ارشاد حسین، سپاہی طفیل خان، سپاہی عاقب علی اور سپاہی محمد زاہد نے بھی جامِ شہادت نوش کیا۔

آئی ایس پی آر نے کہا ہے کہ آپریشن کے دوران دہشتگردوں کے قبضے سے بھاری مقدار میں اسلحہ، گولہ بارود اور مواصلاتی آلات بھی برآمد کیے گئے ہیں۔

ترجمان پاک فوج کی جانب سے بیان میں کہا گیا ہے کہ علاقے میں بھارتی حمایت یافتہ دیگر خوارجیوں کی تلاش کیلئے آپریشن جاری ہے، سکیورٹی فورسز نے ملک میں بھارتی حمایت یافتہ دہشتگردی کے خاتمے کا عزم کر رکھا ہے۔

آئی ایس پی آر کے مطابق پاکستان کی سکیورٹی فورسز دہشتگردی کے مکمل خاتمے کے لیے پرعزم ہیں، شہداء کی قربانیاں ملک میں امن و استحکام کی ضمانت ہیں۔