بلوچستان کے علاقے ماشکیل میں پاک ایران کٹاگر کراسنگ پوائنٹ کا افتتاح

بلوچستان کے عوام کے لیے تجارت، روزگار اور عوامی روابط کے نئے دور کے آغاز کے تحت پاک ایران سرحد پر ماشکیل کے علاقے میں کٹاگر کراسنگ پوائنٹ کا افتتاح کر دیا گیا۔

افتتاحی تقریب میں آئی جی ایف سی بلوچستان (ساؤتھ) نے باضابطہ طور پر کراسنگ پوائنٹ کھولا، تقریب میں رکن صوبائی اسمبلی میر زابد علی ریکی، مقامی عمائدین اور تاجر برادری نے بڑی تعداد میں شرکت کی۔

کٹاگر کراسنگ پوائنٹ کھولنے کا فیصلہ 2 جولائی 2025کو دالبندین میں منعقدہ گرینڈ جرگے** میں کیا گیا تھا۔ وزیراعلیٰ بلوچستان میر سرفراز بگٹی اور کور کمانڈر بلوچستان نے سرحدی علاقوں کے عوام کے لیے راہداری کھولنے کا اعلان کیا تھا۔

یہ راہداری پاکستان اور ایران کے درمیان تجارتی و سماجی روابط کو فروغ دینے میں اہم کردار ادا کرے گی۔ ایف سی بلوچستان نے ضلعی انتظامیہ اور ایرانی حکام کے ساتھ قریبی تعاون کے ذریعے تمام انتظامات مکمل کیے۔

حکام کے مطابق، عوام اور سیکیورٹی اداروں کے باہمی تعاون سے بلوچستان میں امن و ترقی کا سفر تیزی سے جاری ہے۔