ڈی آئی خان میں آپریشن،بھارتی حمایت یافتہ7دہشتگرد ہلاک،میجرسبطین شہید

ڈیرہ اسماعیل خان: پاک فوج نے خفیہ اطلاع پر درابن کے علاقے میں آپریشن کے دوران بھارتی حمایت یافتہ تنظیم سے وابستہ 7 دہشت گردوں کو ہلاک کردیا، کارروائی میں میجر سبطین حیدر جامِ شہادت نوش کرگئے۔

آئی ایس پی آر کے مطابق یہ آپریشن 8 اکتوبر 2025 کو خفیہ اطلاعات کی بنیاد پر کیا گیا، جس کا مقصد بھارتی پراکسی گروہ "فتنۃ الخوارج” سے منسلک دہشت گردوں کی موجودگی کا خاتمہ تھا۔

شدید فائرنگ کے تبادلے کے دوران ضلع کوئٹہ سے تعلق رکھنے والے 30 سالہ میجر سبطین حیدر نے بہادری سے لڑتے ہوئے جامِ شہادت نوش کیا۔

ترجمان کے مطابق مارے گئے دہشت گرد سکیورٹی فورسز، قانون نافذ کرنے والے اداروں اور شہریوں پر حملوں میں ملوث تھے۔
آپریشن کے دوران دہشت گردوں کے قبضے سے اسلحہ اور گولہ بارود بھی برآمد کیا گیا۔

فوج کے مطابق علاقے میں مزید دہشت گردوں کے خاتمے کے لیے کلیئرنس آپریشن جاری ہے۔
ترجمان آئی ایس پی آر کا کہنا ہے کہ پاک فوج دہشتگردی کے مکمل خاتمے اور وطن کے دفاع کے عزم پر قائم ہے، ہمارے بہادر سپوتوں کی قربانیاں قوم کے حوصلے کو مزید مضبوط بناتی ہیں۔