غزہ امن معاہدہ مستقل جنگ بندی کا باعث بنے گا:اسحاق ڈار

اسلام آباد: نائب وزیراعظم اور وزیر خارجہ اسحاق ڈار نے کہا ہے کہ پاکستان امید کرتا ہے کہ غزہ امن معاہدہ مستقل جنگ بندی اور دیرپا امن کے قیام میں اہم کردار ادا کرے گا۔

سماجی رابطے کی ویب سائٹ پر اپنے پیغام میں انہوں نے کہا کہ پاکستان منصوبے کے پہلے مرحلے پر اتفاق کا خیرمقدم کرتا ہے، جس میں فوری جنگ بندی، یرغمالیوں اور قیدیوں کی رہائی اور غزہ تک انسانی امداد کی بلا رکاوٹ فراہمی شامل ہے۔

اسحاق ڈار نے صدر ڈونلڈ ٹرمپ، قطر، مصر اور ترکی کی کوششوں کو سراہتے ہوئے کہا کہ یہ قدم مشرق وسطیٰ میں پائیدار امن کے لیے اہم ہے۔ انہوں نے واضح کیا کہ پاکستان کا موقف برقرار ہے کہ فلسطین کی ایک آزاد ریاست 1967 کے پہلے کی سرحدوں کی بنیاد پر ہونی چاہیے، جس کا دارالحکومت القدس الشریف ہو۔

قبل ازیں وزیراعظم شہباز شریف نے بھی معاہدے کو تاریخی قرار دیتے ہوئے کہا کہ یہ غزہ میں نسل کشی کے خاتمے اور عالمی امن کے قیام کے لیے ایک اہم موقع ہے۔