حماس اور اسرائیل کے درمیان غزہ امن معاہدے پر آج دستخط متوقع

فلسطین کی مزاحمتی تنظیم حماس اور اسرائیل کے درمیان غزہ امن معاہدے پر آج باقاعدہ دستخط ہونے کا امکان ہے۔ ذرائع کے مطابق معاہدے پر دستخط کے بعد غزہ میں جنگ بندی نافذ العمل ہو سکتی ہے اور 24 گھنٹوں میں اسرائیلی فوج جزوی انخلا کا پہلا مرحلہ مکمل کرے گی۔

اسرائیلی وزیراعظم بنیامین نیتن یاہو نے معاہدے کی باضابطہ منظوری کے لیے دو اجلاس بلا لیے ہیں، جبکہ اسرائیلی فوج نے بھی عملی تیاریوں کا آغاز کر دیا ہے۔ تل ابیب میں یرغمالیوں کے اہلخانہ نے معاہدے کو خوش آئند قرار دیا ہے۔

امریکی صدر ڈونلڈ ٹرمپ نے گزشتہ روز سوشل میڈیا پر اعلان کیا کہ اسرائیل اور حماس نے غزہ امن معاہدے پر دستخط کر دیے ہیں اور امید ہے کہ پیر سے یرغمالیوں کی واپسی شروع ہو جائے گی۔

اقوام متحدہ کے سیکرٹری جنرل، وزیراعظم پاکستان اور دیگر عالمی رہنماؤں نے بھی اس معاہدے کو خوش آئند قرار دیتے ہوئے مشرق وسطیٰ میں امن کی کوشش قرار دیا ہے۔