Ummat News Latest Urdu News in Pakistan Politics Headlines Videos
کابل: افغانستان کی وزراتِ دفاع کی جانب سے پاکستان پر فضائی حدود کی خلاف ورزی اور کابل سمیت دو مقامات پر فضائی حملوں کا الزام عائد کیا گیا ہے۔
سوشل میڈیا پلیٹ فارم ’ایکس‘ پرافغان وزاتِ دفاع کے سرکاری اکاؤنٹ سے جاری کردہ بیان میں دعویٰ کیا گیا ہے کہ ایک بار پھر پاکستان نے افغانستان کی فضائی حدود کی خلاف ورزی کی ہے اور کابل اور ڈیورنڈ لائن کے قریب پکتیکا کے علاقے میں ایک بازار پر بمباری کی ہے۔
افغان وزراتِ دفاع نے پاکستان کے مبینہ حملے کو ایک ’پُرتشدد‘ اور ’قابلِ مذمت عمل‘ قرار دیتے ہوئے کہا ہے کہ افغانستان اور پاکستان کی تاریخ میں ایسے اقدام کی مثال نہیں ملتی۔ ’ہم افغانستان کی فضائی حدود کی اس خلاف ورزی کی سخت ترین الفاظ میں مذمت کرتے ہیں اور اپنی خودمختاری کا دفاع ہمارا حق ہے۔
البان کی وزراتِ دفاع کا کہنا ہے کہ ان اقدامات کے بعد اگر صورتِحال مزید کشیدہ ہوتی ہے تو اس کے نتائج کی ذمہ داری پاکستانی فوج پر عائد ہو گی۔
ادھر انڈیا کے دورے پر موجود افغانستان کے وزیر خارجہ امیر خان متقی نے کابل اور دیگر علاقوں میں متعدد دھماکوں (جنھیں مبینہ طور پر پاکستان کے حملے قرار دیا جا رہا ہے) پر اپنا ردعمل دیتے ہوئے کہا ہے کہ ’میرے پاس یہ اطلاع ہے کہ کابل میں ایک دھماکے کی آواز سنی گئی لیکن رات بھر کی تلاش کے بعد کسی جانی نقصان کی اطلاع نہیں ملی اور ہمیں ابھی تک معلوم نہیں کہ وہ آواز کس چیز کی تھی آیا وہاں معدنیات میں کام کرنے والوں نے کوئی دھماکہ کیا یا کوئی اور بات ہے۔‘
افغانستان کے وزیر خارجہ نے کہا ’تاہم دور دراز سرحدی علاقوں میں کچھ حملے ہوئے ہیں جن کی ہم مذمت کرتے ہیں۔ اور اسے پاکستان حکومت کی غلطی سمجھتے ہیں۔ اس طرح کے مسائل طاقت کے ذریعے حل نہیں کیے جا سکتے۔‘
اس حوالے سے پاکستانی حکومت کی جانب سے تاحال کوئی ردِعمل سامنے نہیں آیا تاہم جمعہ کی سہ پہر پشاور میں ایک پریس کانفرنس کے دوران جب پاکستانی فوج کے ترجمان لیفٹیننٹ جنرل احمد شریف چوہدری سے اس بارے میں سوالات کیے گئے توانھوں نے اس کی تصدیق یا تردید کرنے سے گریز کیا اور کہا کہ پاکستانی عوام کے جان و مال کی حفاظت کے لیے ضروری اقدامات کیے جائیں گے اور کیے جاتے رہیں گے۔
