ابوظبی میں دو پاکستانی نوجوان مصنفات کی کتابوں کی تقریبِ رونمائی

ابوظبی: پاکستانی سفارتخانے میں دو باصلاحیت نوجوان لکھاریوں، آمنہ منور خان اور دعا فرحان کی کتابوں کی تقریبِ رونمائی منعقد ہوئی، جس کی میزبانی پاکستان کے سفیر فیصل نیاز ترمذی نے کی۔

تقریب میں ادب دوست شخصیات، اوورسیز پاکستانی کمیونٹی کے نمائندے اور نوجوان طلبہ نے شرکت کی۔

سفیرِ پاکستان فیصل نیاز ترمذی نے تقریب سے خطاب کرتے ہوئے کہا کہ اوورسیز پاکستانی نوجوان قوم کا فخر ہیں، جو اپنی تخلیقی صلاحیتوں سے دنیا میں پاکستان کا روشن چہرہ پیش کر رہے ہیں۔

آمنہ منور خان کی کتاب *“گرل ہوڈ ڈائریز” (Girlhood Diaries)* نوجوان لڑکیوں کے احساسات، خوابوں اور سماجی چیلنجز کو نرمی اور گہرائی سے بیان کرتی ہے، جبکہ دعا فرحان کی تصنیف *“دی ٹروتھ بی ہائنڈ دی ایول” (The Truth Behind the Evil)* نیکی اور بدی کے ازلی تصادم کو فلسفیانہ انداز میں پیش کرتی ہے۔

شرکائے تقریب نے دونوں مصنفات کے کام کو پاکستان کے ادبی منظرنامے میں خوش آئند اضافہ قرار دیا۔

تقریب کے اختتام پر پاکستانی سفارتخانے کی جانب سے دونوں نوجوان لکھاریوں کو تعریفی اسناد اور خراجِ تحسین پیش کیا گیا۔