پاکستان، سعودی عرب کا آئی ٹی و کھیلوں میں تعاون پر اتفاق

 کراچی: پاکستان اور سعودی عرب نے نوجوانوں کے لیے آئی ٹی اور کھیلوں کے شعبوں میں تعاون بڑھانے پر اتفاق کرلیا۔

جمعہ کے روز گورنر ہاؤس کراچی میں گورنر سندھ کامران خان ٹیسوری اور شہزادہ منصور بن محمد آل سعود کی موجودگی میں دو اہم مفاہمتی یادداشتوں (MoUs) پر دستخط کیے گئے۔

معاہدوں کے تحت دونوں ممالک نوجوانوں کو جدید آئی ٹی تعلیم، تربیت اور کھیلوں کے فروغ کے لیے مزید مواقع فراہم کریں گے۔

تقریب میں سعودی سفیر نواف سعید المالکی، قونصل جنرل محمد عبداللہ السبیعی، سعودی عرب میں پاکستانی سفیر احمد فاروق اور دونوں ممالک کے اعلیٰ حکام شریک تھے۔

گورنر سندھ کامران خان ٹیسوری نے اس موقع پر کہا کہ تعلیم، ٹیکنالوجی اور کھیل کے فروغ سے نوجوانوں کے لیے روشن مستقبل ممکن ہے، جبکہ پاکستان اور سعودی عرب کی کرکٹ ٹیموں کے درمیان جلد ایک دوستانہ میچ بھی منعقد ہوگا۔

دورے کے اختتام پر گورنر سندھ نے شہزادہ منصور بن محمد آل سعود اور وفد کو کراچی ایئرپورٹ پر الوداع کیا۔ شہزادہ منصور نے گرمجوش میزبانی اور تعاون پر گورنر سندھ کا شکریہ ادا کیا۔