چین پر ایک سو فیصد ٹیرف نافذ ہوگا،ٹرمپ کا اعلان

واشنگٹن: امریکی صدر نے اعلان کیا ہے کہ چین سے درآمدات پر سو فیصد ٹیرف عائد کیا جائے گا، جس کا نفاذ نومبر یا اس سے پہلے کیا جا سکتا ہے۔

صدر نے میڈیا سے بات میں کہا کہ چینی صدر شی جن پنگ کے ساتھ ملاقات منسوخ نہیں کی گئی اور وہ مشرقِ وسطیٰ کے دورے کے دوران مصر جائیں گے اور اسرائیلی پارلیمنٹ سے بھی خطاب کریں گے۔

صدر نے مزید کہا کہ یرغمالیوں کی واپسی پیر سے شروع ہو رہی ہے۔ انہوں نے دعویٰ کیا کہ انہوں نے پاکستان، بھارت سمیت آٹھ جنگوں کو روکا۔ ٹرمپ کا کہنا تھا کہ پاک بھارت تنازعے کے دوران سات طیارے گرائے گئے اور چونکہ دونوں ممالک جوہری قوتیں ہیں، اس لیے انہیں جنگ سے روک دیا گیا۔ انہوں نے خبردار کیا کہ اگر دونوں ممالک جنگ کریں گے تو امریکہ بھاری ٹیرف عائد کرنے پر تیار ہے۔