وفاقی وزیر داخلہ محسن نقوی سے تبلیغی جماعت کے وفد کی ملاقات

 

اسلام آباد: وفاقی وزیر داخلہ محسن نقوی سے تبلیغی جماعت کے وفد نے ملاقات کی اور نومبر میں ہونے والے سالانہ تبلیغی اجتماع کی تیاریوں سے متعلق تفصیلات پیش کیں۔

ملاقات کرنے والے وفد میں انوار غنی، اقبال میاں، محمد عامر اور زاہد پراچہ شامل تھے، جبکہ وزیر مملکت برائے داخلہ طلال چوہدری، چیف کمشنر اور آئی جی اسلام آباد بھی اس موقع پر موجود تھے۔

محسن نقوی نے یقین دہانی کرائی کہ وزارت داخلہ اجتماع کے انعقاد کے لیے ہر ممکن تعاون فراہم کرے گی، اور غیر ملکی شرکا کو ویزہ کے حصول میں مکمل سہولت دی جائے گی۔ انہوں نے کہا کہ گزشتہ سال کی طرح اس بار بھی ہوائی اڈوں پر خصوصی کاؤنٹر قائم کیے جائیں گے تاکہ بین الاقوامی مہمانوں کو آسانی فراہم کی جا سکے۔

وفد نے بتایا کہ گزشتہ سال 108 ممالک سے 15 ہزار سے زائد شرکا تبلیغی اجتماع میں شریک ہوئے تھے۔

ملاقات کے اختتام پر سیلاب زدگان، ملکی سلامتی اور ترقی کے لیے خصوصی دعا بھی کی گئی۔