سوڈان کے شہر الفشیر میں پیراملٹری فورسز کے حملوں میں کم از کم 60 افراد ہلاک

سوڈان کے مغربی شہر الفشیر میں پیراملٹری ریپڈ سپورٹ فورسز (آرایس ایف) کے حملوں میں کم از کم 60 افراد  ہلاک  ہو گئے ہیں۔ ہلاک ہونے والوں میں خواتین، بچے اور بزرگ شامل ہیں جبکہ کئی کی لاشیں جل کر خاکستر ہو گئی ہیں۔

عالمی میڈیا کے مطابق آرایس ایف نے شہر کا محاصرہ کر لیا اور پناہ گاہوں اور اسپتالوں کو نشانہ بنایا۔ ابتدائی طور پر ہلاکتوں کی تعداد 30 بتائی گئی تھی جو بعد میں بڑھ کر 60 ہو گئی۔ حملے میں دو ڈرونز اور آٹھ توپ خانے کے گولے استعمال کیے گئے۔

مقامی مزاحمتی کمیٹی کا کہنا ہے کہ یونیورسٹی کے قریب دار الارقم میں قائم بے گھر افراد کے کیمپ پر یہ حملہ کیا گیا، جہاں ہزاروں بے سہارا افراد پناہ لیے ہوئے تھے۔ شہر الفشیر شمالی دارفور کا دارالحکومت ہے اور اب تک آرایس ایف کے مکمل کنٹرول میں نہیں آیا، جس کی وجہ سے یہ ایک اسٹریٹیجک جنگی میدان بن چکا ہے۔

اقوام متحدہ کے انسانی حقوق کے ہائی کمشنر وولکر ترک نے اس واقعے کی سخت الفاظ میں مذمت کی اور کہا کہ شہریوں کو قتل اور زخمی کرنے کے ساتھ اسپتالوں اور مساجد کو بھی نشانہ بنایا جا رہا ہے، جو بین الاقوامی قوانین کی کھلی خلاف ورزی ہے۔

سوڈان میں اپریل 2023 سے فوج اور ریپڈ سپورٹ فورسز کے درمیان کشمکش جاری ہے، جس کے نتیجے میں اب تک ہزاروں افراد ہلاک اور لاکھوں بے گھر ہو چکے ہیں جبکہ تقریباً 2 کروڑ 50 لاکھ افراد شدید بھوک کا شکار ہیں۔