خیبرپختونخوا اسمبلی میں وزیراعلیٰ کے انتخاب کا شیڈول جاری

پشاور — خیبرپختونخوا اسمبلی میں نئے وزیراعلیٰ کے انتخاب کے لیے شیڈول جاری کر دیا گیا ہے۔ اسمبلی سیکریٹریٹ کے مطابق وزیراعلیٰ کے انتخاب کے لیے اجلاس کل 13 اکتوبر صبح 10 بجے طلب کیا گیا ہے۔

سیکریٹری اسمبلی نے بتایا کہ امیدوار اپنے کاغذاتِ نامزدگی کل دوپہر 3 بجے تک جمع کرا سکیں گے، جن کی فوری اسکروٹنی کے بعد شام 5 بجے حتمی فہرست جاری کی جائے گی۔

ذرائع کے مطابق وزیراعلیٰ کے انتخاب کے دوران ایوان کی کارروائی براہِ راست میڈیا پر نشر کرنے کی اجازت دی جائے گی تاکہ عوام انتخابی عمل کو براہِ راست دیکھ سکیں۔

اسمبلی اجلاس کے موقع پر سیکیورٹی کے سخت انتظامات کیے گئے ہیں۔ اسمبلی ہال اور اس کے اطراف میں پولیس کی اضافی نفری تعینات کی جا رہی ہے تاکہ کسی بھی ناخوشگوار واقعے سے بچا جا سکے۔