غزہ میں جنگ بندی پر پیش رفت، امریکا کے 200 فوجی اسرائیل پہنچ گئے

غزہ جنگ بندی معاہدے کے پہلے مرحلے میں امریکا کے 200 فوجی اسرائیل پہنچ گئے۔

امریکی میڈیا کے مطابق یہ فوجی غزہ میں داخل ہوئے بغیر وہاں موجود مصر، قطر اور ترکیے کے فوجیوں کے ساتھ تعاون کریں گے۔

ذرائع کے مطابق اسرائیلی فوج غزہ امن معاہدے کے تحت مقررہ حدود تک واپس آگئی ہے۔ اس پیش رفت کا جائزہ لینے کے لیے امریکی نمائندہ خصوصی اسٹیو وٹکوف نے غزہ کا دورہ کیا اور تصدیق کی کہ اسرائیلی فوج کے انخلا کا پہلا مرحلہ مکمل ہو چکا ہے۔

امریکی سینٹ کام کے سربراہ ایڈمرل بریڈ کوپر نے اپنے بیان میں کہا کہ ان کے دورے کا مقصد یہ دیکھنا تھا کہ سینٹ کام کی زیرِ قیادت سول ملٹری کوآرڈی نیشن سینٹر کس طرح قائم کیا جائے۔ انہوں نے واضح کیا کہ غزہ میں امریکی فوجی تعینات نہیں ہوں گے۔