پاکستان کے دفاع پر کوئی سمجھوتہ نہیں ہوگا، صدر ،وزیراعظم

صدر آصف علی زرداری کا دوٹوک مؤقف: پاکستان کی سلامتی پر کوئی سمجھوتہ نہیں ہوگا

اسلام آباد: صدرِ مملکت آصف علی زرداری نے افغانستان کی جانب سے جارحیت پر سخت ردعمل دیتے ہوئے کہا ہے کہ پاکستان اپنے قومی مفادات، علاقائی خودمختاری اور سلامتی کے تحفظ کے لیے مکمل طور پر پرعزم ہے۔

صدر آصف علی زرداری نے واضح کیا کہ جموں و کشمیر پر بھارت کا کوئی بھی غیر قانونی دعویٰ عالمی قوانین اور اقوام متحدہ کی قراردادوں کے منافی ہے، اور پاکستان اس حوالے سے کسی متنازعہ یا گمراہ کن موقف کو کسی صورت تسلیم نہیں کرے گا۔

انہوں نے افسوس کا اظہار کیا کہ افغان قیادت نے مقبوضہ جموں و کشمیر کے مظلوم عوام کی جدوجہدِ آزادی سے منہ موڑ کر تاریخ اور امت دونوں کے ساتھ ناانصافی کی ہے۔

صدرِ مملکت نے کہا کہ اقوام متحدہ کی رپورٹوں سے یہ حقیقت ثابت ہے کہ افغان سرزمین سے پاکستان مخالف دہشت گرد حملے کیے جا رہے ہیں۔ فتنۂ خوارج اور فتنۂ ہندوستان کی گٹھ جوڑ سے پاکستان کے شہری اور سیکیورٹی اہلکار نشانہ بن رہے ہیں۔

انہوں نے افغان قیادت پر زور دیا کہ وہ پاکستان مخالف دہشت گرد عناصر کے خاتمے کے لیے فوری اور عملی اقدامات کرے، کیونکہ دہشت گردی کے خلاف جنگ مشترکہ ذمہ داری ہے، اسے کسی ایک ملک پر نہیں ڈالا جا سکتا۔

صدر آصف زرداری نے کہا کہ پاکستان نے چار دہائیوں تک افغان عوام کی میزبانی کر کے اسلامی اخوت اور اچھے ہمسائیگی کی مثال قائم کی، تاہم اب قومی خودمختاری پر کوئی سمجھوتہ نہیں کیا جائے گا۔

انہوں نے کہا کہ پاکستان نے تجارت، معیشت اور روابط کے فروغ کے لیے افغانستان کو ہر ممکن سہولت فراہم کی ہے، مگر دہشت گردی کے خطرے کے خاتمے کے لیے عملی تعاون ناگزیر ہے۔

صدر مملکت نے مزید کہا کہ پاکستان ایک پرامن، مستحکم اور خوشحال افغانستان کا خواہاں ہے، کیونکہ باہمی احترام، سیکیورٹی تعاون اور خطے کے امن کے بغیر ترقی ممکن نہیں۔

دوسری جانب وزیراعظم شہباز شریف نے افغانستان کی جانب سے سرحدی علاقوں میں اشتعال انگیزی کی شدید مذمت کرتے ہوئے کہا ہے کہ پاکستان کے دفاع پر کوئی سمجھوتہ نہیں کیا جائے گا۔

وزیراعظم نے مؤثر اور بھرپور جوابی کارروائی پر پاک فوج کو خراجِ تحسین پیش کرتے ہوئے کہا کہ قوم اپنی افواج کی پیشہ ورانہ مہارت اور بہادری پر فخر کرتی ہے۔ ان کا کہنا تھا کہ فیلڈ مارشل کی جرات مندانہ قیادت میں پاک فوج نے دشمن کو واضح پیغام دیا اور افغان فورسز کی متعدد چوکیوں کو تباہ کر کے انہیں پسپائی پر مجبور کر دیا۔

شہباز شریف نے کہا کہ ہر قسم کی اشتعال انگیزی کا منہ توڑ جواب دیا جائے گا، ہمارا دفاع مضبوط ہاتھوں میں ہے اور ہم اپنے وطن کے چپے چپے کا تحفظ کرنا جانتے ہیں۔

انہوں نے مزید کہا کہ پاک فوج نے ہمیشہ ہر بیرونی جارحیت کا ڈٹ کر مقابلہ کیا ہے، پوری قوم اپنی سیکیورٹی فورسز کے ساتھ یکجہتی کے ساتھ کھڑی ہے۔ وزیراعظم نے کہا کہ پاکستان نے بارہا افغانستان کو سرزمین سے سرگرم دہشت گرد عناصر کی معلومات فراہم کی ہیں، مگر افسوس کہ وہاں موجود فتنۂ خوارج اور فتنۂ ہندوستان کے گٹھ جوڑ سے پاکستان مخالف کارروائیاں جاری ہیں۔

وزیراعظم نے افغان قیادت سے مطالبہ کیا کہ وہ یقینی بنائے کہ افغانستان کی سرزمین پاکستان کے خلاف استعمال نہ ہو، کیونکہ خطے کا امن باہمی تعاون اور اعتماد سے ہی ممکن ہے۔