اسلام آباد و راولپنڈی میں بند سڑکیں جزوی طور پر کھول دی گئیں

اسلام آباد(صباح نیوز)مذہبی جماعت کے احتجاج کے باعث وفاقی دارالحکومت اسلام آباد اور راولپنڈی میں بند کی گئی سڑکوں میں سے کچھ سڑکوں کو کھول دیا گیا ،احتجاج کے پیش نظر دارالحکومت اسلام آباد اور راولپنڈی کی شاہراہوں پر تاحال کنٹینرز کھڑے ہیں

عوام کی مشکلات کو دیکھتے ہوئے جڑواں شہروں کی کچھ اہم سڑکوں کو جزوی طور پر کھول دیا گیا ۔ راولپنڈی میں اندرون شہر رہائشی علاقوں کو جانے والے راستے ٹریفک کے لیے کھول دیئے گئے جبکہ مری روڈ سے ملحقہ علاقوں کی گلیوں سے رکاوٹیں بھی ہٹا دی گئیں، فیض آباد مری روڈ پر اسلام آباد کی سمت ٹریفک سنگل لائن میں رواں دواں ہے۔

اسلام آباد ایکسپریس وے اور نائنتھ ایونیو سے ڈبل روڈ کو ملانے والا راستہ بھی جزوی طور پر ٹریفک کے لیے کھول دیا گیا تاہم آئی جی پی روڈ اور راولپنڈی، اسلام آباد کو ملانے والا فیض آباد انٹرچینج تاحال سیل ہے۔