خیبر پختونخوا:ن لیگ اور جے یو آئی نے وزارتِ اعلیٰ کے امیدوار فائنل کر لیے

 پشاور: خیبر پختونخوا میں وزارتِ اعلیٰ کے انتخاب کے لیے اپوزیشن جماعتوں نے اپنے امیدواروں کے کاغذاتِ نامزدگی جمع کرانے کا فیصلہ کر لیا ہے۔

ذرائع کے مطابق اپوزیشن جماعتوں کے درمیان متفقہ امیدوار لانے کے لیے مشاورت جاری ہے، تاہم ابھی تک کسی ایک نام پر اتفاق نہیں ہو سکا۔ مسلم لیگ (ن) اور جمعیت علمائے اسلام (ف) نے وزارتِ اعلیٰ کے لیے اپنے اپنے امیدواروں کے نام فائنل کر لیے ہیں۔

ذرائع کے مطابق جے یو آئی (ف) کی جانب سے اکرم خان درانی یا مولانا لطف الرحمان کو امیدوار نامزد کیے جانے کا امکان ہے، جب کہ مسلم لیگ (ن) کی جانب سے ڈاکٹر عباداللہ مضبوط امیدوار کے طور پر سامنے آئے ہیں۔

جے یو آئی (ف) کے صوبائی امیر مولانا عطا الرحمان نے کہا ہے کہ اپوزیشن جماعتیں آئینی اور قانونی حق کے تحت اپنے امیدوار سامنے لائیں گی، جب کہ متفقہ امیدوار کے لیے مشاورتی عمل جاری ہے۔

اپوزیشن لیڈر ڈاکٹر عباداللہ خان نے بھی تصدیق کی کہ وزارتِ اعلیٰ کے لیے اپوزیشن کی جانب سے امیدوار نامزد کیے جائیں گے اور کوشش ہے کہ ایک متفقہ امیدوار کو میدان میں اتارا جائے۔

واضح رہے کہ چند روز قبل عمران خان نے علی امین گنڈاپور کو وزارتِ اعلیٰ کے عہدے سے ہٹاتے ہوئے سہیل آفریدی کو نیا وزیرِ اعلیٰ نامزد کیا تھا، جس کے بعد علی امین گنڈاپور نے استعفیٰ دے دیا تھا۔