پی ٹی آئی وفد کی گورنر خیبر پختونخوا سے ملاقات

 اسلام آباد: پاکستان تحریکِ انصاف (پی ٹی آئی) کا پارلیمانی وفد گورنر خیبر پختونخوا فیصل کریم کنڈی سے ملاقات کے لیے ان کی رہائش گاہ پہنچا۔

وفد نے وزیرِ اعلیٰ کے انتخابات میں پیپلز پارٹی سے تعاون کی درخواست کی۔ پی ٹی آئی کے وفد میں اسد قیصر، عاطف خان، علی اصغر، جنید اکبر اور ڈاکٹر امجد خان شامل تھے، جبکہ ملاقات میں پیپلز پارٹی کے صوبائی صدر محمد علی شاہ باچا بھی موجود تھے۔

وفد نے کہا کہ پیپلز پارٹی ہمیشہ جمہوری روایات کی پاسداری کرتی آئی ہے اور وزیرِ اعلیٰ کے انتخابات میں بھی ان کا تعاون ضروری ہے۔ گورنر فیصل کریم کنڈی نے کہا کہ علی امین گنڈاپور کے استعفے کی منظوری میں آئین و قانون کی مکمل پاسداری کریں گے اور اپوزیشن جماعتوں سے مشاورت کے ساتھ صوبے کی ترقی کے لیے آگے بڑھا جا سکتا ہے۔

پاکستان تحریک انصاف کے پارلیمانی وفد کی گورنر خیبرپختونخوا فیصل کریم کنڈی سے ملاقات۔ pic.twitter.com/x9Intp8GBV

— Rizwan Ghilzai (Remembering Arshad Sharif) (@rizwanghilzai) October 12, 2025

گورنر نے مزید کہا کہ صوبے میں پائیدار امن اور عوام کو سہولتیں فراہم کرنے کے لیے سب کو مل کر کردار ادا کرنا ہوگا۔

خیبر پختونخوا اسمبلی میں وزیرِ اعلیٰ کے انتخاب کے لیے چار امیدواروں کے کاغذاتِ نامزدگی منظور کر لیے گئے ہیں: حکومتی امیدوار سہیل آفریدی، جے یو آئی ف کے مولانا لطف الرحمٰن، مسلم لیگ ن کی طرف سے سردار شاہ جہان یوسف اور پیپلز پارٹی کے ارباب زرک خان۔ اپوزیشن لیڈر ڈاکٹر عباد اللہ کے مطابق نئے قائد ایوان کے انتخاب کے لیے اپوزیشن متفقہ امیدوار میدان میں اتار کر باقی کاغذات واپس کرے گی۔

جے یو آئی ف کے پارلیمانی لیڈر لطف الرحمٰن اور اپوزیشن لیڈر ڈاکٹر عباد اللہ نے کہا کہ جب ایک وزیر اعلیٰ کا استعفیٰ منظور نہیں ہوا ہو تو دوسرے وزیر اعلیٰ کے انتخاب کے خلاف عدالت سے رجوع ممکن ہے۔