راولپنڈی: احتجاج کے بعد معمولات بحال، تعلیمی ادارے کھل گئے

راولپنڈی: مذہبی جماعت کے احتجاج کے باعث چار روز تک بند رہنے والے تعلیمی ادارے پیر کے روز دوبارہ کھل گئے، جبکہ اسلام آباد اور راولپنڈی میں بند کی گئی تمام رابطہ سڑکیں ٹریفک کے لیے کھول دی گئیں۔

ذرائع کے مطابق مری روڈ سمیت شہر کے دیگر راستوں پر ٹریفک معمول کے مطابق رواں دواں ہے۔ ادھر راولپنڈی مری روڈ پر دکانیں اور تجارتی مراکز بھی کھل گئے ہیں، تاہم فیض آباد جانے والا راستہ اور راولپنڈی، اسلام آباد میٹرو بس سروس تاحال بند ہے۔

انتظامیہ کے مطابق آئی جے پی روڈ، ڈبل روڈ اور ایکسپریس وے کو ٹریفک کے لیے کھول دیا گیا ہے، جبکہ راولپنڈی سے نائنتھ ایونیو جانے والا راستہ بھی بحال کر دیا گیا ہے۔

شہریوں کی سہولت کے لیے راولپنڈی اور اسلام آباد میں موبائل فون اور انٹرنیٹ ڈیٹا سروسز بھی بحال کر دی گئی ہیں۔