پاکستان کی امریکی کمپنیوں کو تیل،معدنیات،زراعت اورآئی ٹی سیکٹر میں سرمایہ کاری کی دعوت

وزیرِ خزانہ محمد اورنگزیب نے امریکی کمپنیوں کو تیل، معدنیات، زراعت اور انفارمیشن ٹیکنالوجی کے شعبوں میں سرمایہ کاری کی دعوت دی ہے۔

واشنگٹن میں امریکی معاون وزیرِ خزانہ رابرٹ کیپ روتھ سمیت دیگر حکام سے ملاقات کے دوران وزیرِ خزانہ نے پاکستان کی معاشی بہتری، اصلاحات اور ورچوئل اثاثوں سے متعلق قانون سازی پر بریفنگ دی۔

محمد اورنگزیب نے پاکستان اور امریکا کے درمیان ٹیرف معاہدے پر کامیاب مذاکرات کو مثبت پیش رفت قرار دیا۔ انہوں نے دولتِ مشترکہ وزرائے خزانہ اجلاس میں موسمیاتی فنانسنگ کی اہمیت اور "لاس اینڈ ڈیمیج فنڈ” کے فوری نفاذ پر بھی زور دیا۔

وزیرِ خزانہ نے اسلامی ترقیاتی بینک کے صدر ڈاکٹر سلیمان الجاسر سے ملاقات میں موٹروے سکس کے دو حصوں کی فنانسنگ کی منظوری پر شکریہ ادا کیا، جبکہ پولیو کے خاتمے اور تیل فراہمی کے منصوبوں میں تعاون بڑھانے پر اتفاق کیا گیا۔

انہوں نے آئی ایف سی کے ریجنل نائب صدر، سٹی بینک کے نمائندوں اور یو ایس پاکستان بزنس کونسل کے اجلاس میں بھی شرکت کی، جہاں باہمی سرمایہ کاری کے فروغ پر تبادلہ خیال کیا گیا۔