حماس نے 4 مغویوں کی لاشیں اسرائیل کے حوالے کردیں

غزہ: فلسطینی مزاحمتی تنظیم حماس نے جنگ بندی معاہدے پر عمل درآمد کرتے ہوئے 20 یرغمالیوں کی رہائی کے بعد 4 مغویوں کی لاشیں بھی اسرائیل کے حوالے کر دیں۔

حماس نے چاروں مغویوں کی لاشیں بین الاقوامی ریڈ کراس کمیٹی کے ذریعے اسرائیلی حکام کے حوالے کیں۔ اسرائیلی میڈیا کے مطابق ان میں گائے ایلوز، یوسی شارابی، بپن جوشی اور ڈینیئل پریز شامل ہیں۔

حماس کا کہنا ہے کہ باقی 24 مغویوں کی لاشوں کی نشاندہی اور نکالنے میں وقت لگ سکتا ہے کیونکہ تدفین کے تمام مقامات کا درست علم نہیں۔

گزشتہ روز حماس نے معاہدے کے تحت 20 زندہ یرغمالیوں کو رہا کیا تھا، جنہیں طبی معائنے کے بعد اہلخانہ سے ملوایا گیا۔

دوسری جانب اسرائیلی جیلوں سے ایک ہزار 968 فلسطینی قیدی رہا کیے گئے جو بسوں کے ذریعے غزہ اور مغربی کنارے پہنچے۔ برسوں بعد اپنے پیاروں سے ملنے پر اہلخانہ خوشی سے اشکبار ہو گئے اور ایک دوسرے کو گلے لگا کر خوشی کا اظہار کیا۔