انسدادِ دہشت گردی عدالت کا علیمہ خان کی گرفتاری کا حکم

راولپنڈی: انسدادِ دہشت گردی عدالت نے بانی تحریکِ انصاف عمران خان کی ہمشیرہ علیمہ خان کے ناقابلِ ضمانت وارنٹ گرفتاری جاری کرتے ہوئے انہیں گرفتار کر کے عدالت میں پیش کرنے کا حکم دے دیا۔

انسدادِ دہشت گردی عدالت راولپنڈی کے جج امجد علی شاہ نے تھانہ صادق آباد میں درج 26 نومبر ڈی چوک احتجاج کیس کی سماعت کی، جس میں علیمہ خان کو آج فردِ جرم کے لیے طلب کیا گیا تھا۔

تاہم علیمہ خان عدالت میں پیش نہ ہوئیں، جس پر عدالت نے ان کی حاضری معافی کی درخواست مسترد کر دی اور وارنٹ گرفتاری جاری کر دیے۔

عدالت نے قرار دیا کہ طلبی کے باوجود بار بار پیش نہ ہونا عدالتی کارروائی میں رکاوٹ ڈالنے کے مترادف ہے۔
جج نے حکم دیا کہ ناقابلِ ضمانت وارنٹ گرفتاری کی تعمیل کے لیے احکامات فوری طور پر تفتیشی افسر کو فراہم کیے جائیں۔

پولیس ذرائع کے مطابق، وارنٹ کے ہمراہ پولیس ٹیم اڈیالہ جیل جائے گی، جہاں علیمہ خان توشہ خانہ ٹو کیس کی سماعت کے لیے موجود ہیں۔
ذرائع نے بتایا کہ جیل میں سماعت مکمل ہونے کے بعد علیمہ خان کی گرفتاری یا وارنٹ کی تعمیل عمل میں لائی جائے گی۔