ایران کی پاکستان کے لیے براہِ راست پروازوں کا آغاز

ایران ایئر نے پاکستان کے لیے فلائٹ آپریشن شروع کرنے کا فیصلہ کر لیا ہے اور مشہد سے لاہور کے درمیان پروازوں کا اعلان کر دیا ہے۔ ایئر لائن کی جانب سے بتایا گیا ہے کہ ہفتہ وار یہ پرواز 29 اکتوبر سے باقاعدہ شروع ہوگی۔

دوسری جانب، پاکستان کی سول ایوی ایشن اتھارٹی نے سیرین ایئر کو دو ہفتے کے لیے مشروط فلائٹ آپریشن کی اجازت دی ہے تاکہ ایئرلائن جدہ میں پھنسے مسافروں کو واپس پاکستان لائے۔ ترجمان کا کہنا ہے کہ سیرین ایئر کو ملک سے بیرونِ ملک پروازیں چلانے کی اجازت نہیں ہوگی اور یہ اجازت صرف جدہ میں پھنسے مسافروں کو وطن واپس لانے تک محدود ہے۔

سول ایوی ایشن اتھارٹی نے ریگولیٹری قوانین کی خلاف ورزی پر سیرین ایئر کا ایئر آپریٹر سرٹیفکیٹ معطل کر دیا تھا۔ جاری نوٹیفکیشن میں کہا گیا کہ ایک بھی قابل پرواز طیارہ نہ ہونے کی وجہ سے ایئر لائن کا فضائی آپریشن معطل کیا گیا۔

سیرین ایئر انتظامیہ نے موقف اختیار کیا کہ سعودی عرب میں ایک جہاز حادثے کے سبب grounded ہے اور وہ سعودی عرب میں پھنسے مسافروں کو واپس لانے کی اجازت چاہتی ہے۔