سلطان آف جوہر ہاکی کپ، پاکستان اور بھارت کا میچ 3-3 گول سے برابر

کوالالمپور: سلطان آف جوہر ہاکی کپ میں پاکستان اور بھارت کا میچ برابر ہوگیا۔ملائیشیا میں جاری سلطان آف جوہر ہاکی کپ میں پاکستان اور بھارت کی جونئیر ٹیموں کے درمیان میچ 3-3 گول سے برابر ہوگیا۔

پاکستان کی جانب سے 2 گول سفیان خان اور ایک گول حنان شاہد نے بنایا۔جوہر بارو میں پاکستان اور بھارت کے درمیان میچ برق رفتاری سے شروع ہوا ، چوتھے ہی منٹ میں پاکستان کو پنالٹی اسٹروک مل گیا ، جس پر کپتان حنان شاہد نے گول کر دیا۔پہلا کواٹر 0-1  پر ختم ہوا ،دوسرے کواٹر میں کوئی ٹیم گول نہ کرسکی۔

تیسرے کوارٹر میں کھیل میں مزید تیزی آئی ، پاکستان کے سفیان خان نے 38ویں منٹ میں پنالٹی کارنر پر گول میں بدلا اور اسکور 2 صفر کر دیا۔4  منٹ بعد ہی بھارت کو پنالٹی اسٹروک ملا جس پر ہنڈل ارجیت سنگھ نے خسارہ کم کیا ،تیسرا کواٹر پاکستان کی 1-2 کی برتری پر ختم ہوا۔چوتھے اور آخری کوارٹر میں بھارتی ٹیم نے پہلے مقابلہ برابر کیا جس کے بعد 52ویں منٹ میں بھارت کے منمیت سنگھ نے گول کرکے اپنی ٹیم کو 2-3 برتری دلا دی۔تاہم  3 منٹ بعد ہی سفیان خان نے خوبصورت گول کرکے مقابلہ برابر کردیا  اور مقررہ وقت پر میچ 3-3  گول کی برابری پر ختم ہوا۔