پاکستان کی آئی ٹی برآمدات کو 5 ارب ڈالر تک پہنچانے کا ہدف مقرر

دبئی: وفاقی وزیر برائے انفارمیشن ٹیکنالوجی شزا فاطمہ نے کہا ہے کہ پاکستان کی آئی ٹی برآمدات کو آئندہ سال تک 5 ارب ڈالر تک بڑھانے کا ہدف مقرر کیا گیا ہے۔

دبئی میں پاکستان مشنز برائے یو اے ای کی جانب سے وزارتِ آئی ٹی اینڈ ٹیلی کمیونی کیشن، پاکستان سافٹ ویئر ایکسپورٹ بورڈ اور ٹریڈ ڈیولپمنٹ اتھارٹی آف پاکستان کے تعاون سے "پاکستان ٹیک ایوننگ” کا انعقاد کیا گیا۔ تقریب سے خطاب کرتے ہوئے شزا فاطمہ نے بتایا کہ گزشتہ مالی سال میں پاکستان کی آئی ٹی برآمدات 3.8 ارب ڈالر رہیں، جبکہ آئندہ سال تک 5 ارب ڈالر تک بڑھانے کا ہدف مقرر کیا گیا ہے۔

وزیر نے کہا کہ خلیجی ممالک کی جانب سے پاکستان میں سرمایہ کاری کے مواقع بڑھ رہے ہیں، خاص طور پر سب میرین کیبلز اور ڈیٹا سینٹرز کے قیام کے سلسلے میں پیش رفت ہو رہی ہے۔ انہوں نے مزید کہا کہ حکومت رواں سال 10 لاکھ پاکستانی نوجوانوں کو انفارمیشن ٹیکنالوجی کی مفت تربیت فراہم کر رہی ہے تاکہ ملک میں ڈیجیٹل ہنر اور برآمدی استعداد کو فروغ دیا جا سکے۔

اس موقع پر پاکستان کے سفیر برائے متحدہ عرب امارات فیصل نیاز ترمذی نے کہا کہ پاکستان جدت، سرمایہ کاری اور عالمی تعاون کے ذریعے موجودہ 4 ارب ڈالر کی آئی ٹی برآمدات کو بڑھا کر 100 ارب ڈالر تک لے جانے کی صلاحیت رکھتا ہے۔