وفاقی وزیر داخلہ محسن نقوی سے آسٹریلوی ہائی کمشنر نیل ہاکنز کی ملاقات

اسلام آباد:وفاقی وزیر داخلہ محسن نقوی سے آسٹریلیا کے ہائی کمشنر نیل ہاکنز نے ملاقات کی، جس میں پاک آسٹریلیا تعلقات، مختلف شعبوں میں باہمی تعاون اور کوسٹ گارڈز، بارڈر مینجمنٹ سمیت انسانی اسمگلنگ کی روک تھام پر تعاون بڑھانے پر بات چیت کی گئی۔ملاقات کے دوران آسٹریلوی ہائی کمشنر نے حالیہ دہشتگرد حملوں میں پولیس اور سیکیورٹی فورسز کے افسران و جوانوں کی شہادتوں پر افسوس کا اظہار کیا۔ انہوں نے قذافی اسٹیڈیم کی بحالی اور اسلام آباد کے ترقیاتی منصوبوں کو بھی قابلِ تعریف قرار دیا۔نیل ہاکنز کا کہنا تھا کہ محسن نقوی کی قیادت میں اسلام آباد میں نمایاں بہتری آئی ہے، اور پاکستان کا بین الاقوامی وقار بڑھا ہے۔ انہوں نے کہا کہ پاکستان میں گزارا گیا وقت یادگار رہا جبکہ لاہور کا دربار بی بی پاک دامن ان کی پسندیدہ جگہ ہے۔محسن نقوی نے اس موقع پر کہا کہ حکومت غیر قانونی امیگریشن کی حوصلہ شکنی اور قانونی امیگریشن کے فروغ پر یقین رکھتی ہے، غیر قانونی طریقے سے بیرونِ ملک جانے والے افراد کو وطن واپسی پر سخت کارروائی کا سامنا کرنا پڑے گا۔ انہوں نے کہا کہ انسانی اسمگلنگ میں ملوث عناصر کے خلاف آہنی ہاتھوں سے نمٹا جا رہا ہے۔وزیر داخلہ نے دوطرفہ تعلقات کے فروغ میں نیل ہاکنز کی خدمات کو سراہا اور ان کے مستقبل کے لیے نیک خواہشات کا اظہار کیا۔اس موقع پر وزیر مملکت طلال چوہدری، وفاقی سیکرٹری داخلہ خرم آغا اور آسٹریلوی ہائی کمیشن کے اعلیٰ حکام بھی موجود تھے۔