پاک فوج اور قازقستان کی مشترکہ مشق دوستریم V چیراٹ میں جاری

راولپنڈی، پاکستان اور قازقستان کی افواج کے درمیان انسدادِ دہشت گردی کی مشترکہ مشق دوستریم V چیراٹ میں جاری ہے۔

ترجمان آئی ایس پی آر کے مطابق یہ مشق 13 سے 24 اکتوبر 2025 تک اسپیشل آپریشنز اسکول چیراٹ میں ہو رہی ہے، جس میں پاک فوج کے اسپیشل سروسز گروپ (SSG) اور قازقستان آرمی کے اسپیشل فورسز کے دستے شریک ہیں۔

مشق کی افتتاحی تقریب 14 اکتوبر کو چیراٹ میں منعقد ہوئی۔ آئی ایس پی آر کا کہنا ہے کہ اس مشق کا مقصد مشترکہ تربیت کے ذریعے پیشہ ورانہ مہارتوں میں اضافہ اور دونوں ممالک کے درمیان فوجی تعلقات کو مزید مستحکم بنانا ہے۔

دونوں ممالک کے اہلکار ایک دوسرے کے تجربات سے استفادہ کرنے اور انسدادِ دہشت گردی کے جدید طریقہ کار سیکھنے کے منتظر ہیں۔