برطانوی شہزادہ اینڈریو کا ’ڈیوک آف یارک‘ کا لقب واپس کرنے کا اعلان

لندن: برطانوی شہزادہ اینڈریو نے اپنا شاہی لقب ’ڈیوک آف یارک‘ واپس کرنے کا اعلان کر دیا۔

شہزادہ اینڈریو کا کہنا ہے کہ وہ بادشاہ چارلس کے ساتھ مشاورت کے بعد تمام شاہی اعزازات اور القابات کے استعمال سے دستبردار ہو رہے ہیں۔

اپنے بیان میں انہوں نے کہا کہ وہ اب بھی ’پرنس اینڈریو‘ کے طور پر جانے جائیں گے، تاہم آئندہ کوئی شاہی خطاب استعمال نہیں کریں گے۔ ان کے مطابق آنجہانی ملکہ الزبتھ دوم کی جانب سے دیا گیا لقب ’ڈیوک آف یارک‘ بھی واپس کر دیا گیا ہے۔

برطانوی میڈیا کے مطابق شہزادہ اینڈریو کی سابقہ اہلیہ سارہ فرگوسن بھی شاہی القابات استعمال نہیں کریں گی، جبکہ ان کی بیٹیاں شہزادی بیٹریس اور شہزادی یوجینی اپنے شاہی عناوین برقرار رکھیں گی۔

خیال رہے کہ شہزادہ اینڈریو کو ماضی میں امریکی کاروباری شخصیت جیفری ایپسٹین سے تعلقات کے باعث شدید تنقید کا سامنا رہا ہے، تاہم انہوں نے ان الزامات کی دوبارہ سختی سے تردید کی ہے۔