وزیر خزانہ محمد اورنگزیب کا فچ کی پاکستان کی کریڈٹ ریٹنگ پر اظہار تشکر

واشنگٹن: وزیر خزانہ محمد اورنگزیب نے پاکستان کی کریڈٹ ریٹنگ کو B- کے ساتھ مستحکم آؤٹ لک دینے پر بین الاقوامی ریٹنگ ایجنسی فچ کا شکریہ ادا کیا۔

دورہ امریکا کے دوران وزیر خزانہ نے فچ ریٹنگز کے حکام سے ملاقات کی اور پاکستان کی اقتصادی اصلاحات اور پیشرفت پر تفصیلی تبادلہ خیال کیا۔

محمد اورنگزیب نے کہا کہ تینوں بڑی بین الاقوامی ریٹنگ ایجنسیوں کی درجہ بندی میں ہم آہنگی پاکستان کی اقتصادی استحکام کی تصدیق کرتی ہے۔ انہوں نے فچ ٹیم کو بین الاقوامی مالیاتی فنڈ (IMF) کے ساتھ طے پانے والے اسٹاف لیول معاہدے کے بارے میں آگاہ کیا۔

وزیر خزانہ نے حکومت کے نجکاری کے عمل کو تیز کرنے، مالی استحکام اور کارکردگی میں مزید بہتری لانے کے عزم کا اظہار کیا۔ انہوں نے ٹیکس نظام، توانائی، نجکاری اور سرکاری اداروں میں جاری اصلاحات پر بھی روشنی ڈالی۔

اس کے علاوہ محمد اورنگزیب نے امریکی انتظامیہ کے ساتھ تجارتی اور ٹیرف مذاکرات کے بارے میں بھی فچ ٹیم کو آگاہ کیا اور پاکستان کی معیشت میں استحکام اور اصلاحاتی عمل کے تسلسل کے عزم کا اعادہ کیا۔