سانحۂ کارساز کے شہداء کو خراجِ عقیدت پیش کرتی ہوں،شازیہ مری

اسلام آباد: پاکستان پیپلز پارٹی پارلیمینٹرینز کی مرکزی ترجمان شازیہ مری نے کہا ہے کہ 18 اکتوبر جمہوریت کے پروانوں کا دن ہے اور سانحۂ کارساز کے شہداء کو خراجِ عقیدت پیش کرتی ہوں۔

شازیہ مری نے بیان میں کہا کہ شہداء کے ناقابل شکست حوصلے، وفاداری اور عظیم قربانیوں کو سرخ سلام پیش کرتی ہوں۔ 18 اکتوبر 2007ء کو 30 لاکھ سے زائد افراد نے شہید محترمہ بینظیر بھٹو کا وطن واپسی پر تاریخی استقبال کیا، اور 180 جیالوں نے جمہوریت اور اپنی قائد کی خاطر جانوں کا نذرانہ پیش کیا۔

انہوں نے مزید کہا کہ حملہ کرنے والے جمہوریت کی روشنی کو بجھانا چاہتے تھے مگر ناکام رہے، اور ہم شہید محترمہ بینظیر بھٹو اور سانحۂ کارساز کے شہداء کے مشن کو آگے بڑھاتے رہیں گے۔

چیئرمین بلاول بھٹو زرداری کی ہدایت پر 18 اکتوبر کو ملک بھر کے ضلعی ہیڈکوارٹرز میں دعائیہ تقاریب کا انعقاد کیا جا رہا ہے۔