پکتیکا میں پاکستانی حملوں میں مارے گئے دہشت گردوں کے نام سامنے آگئے

اسلام آباد: پاک فوج نے افغان صوبے پکتیکا میں انٹیلی جنس کی بنیاد پر کارروائی کرتے ہوئے خارجی گل بہادر گروپ کے متعدد ٹھکانے تباہ کر دیے، کارروائی میں 70 سے زائد دہشتگرد ہلاک ہو گئے جن میں کئی اہم سرغنہ بھی شامل ہیں۔

سیکیورٹی حکام کے مطابق 17 اکتوبر کی رات انتہائی ٹارگٹڈ آپریشن میں پکتیکا کے مختلف علاقوں میں موجود گل بہادر گروپ کے دہشتگرد ٹھکانوں کو مؤثر انداز میں نشانہ بنایا گیا۔ انٹیلی جینس ذرائع کی مصدقہ اطلاعات پر کی گئی ان اسٹرائیکس میں دہشتگردوں کو بھاری جانی نقصان پہنچا۔

حکام کے مطابق مارے جانے والوں میں گل بہادر گروپ کے اہم سرغنہ شامل ہیں، جن میں خارجی فرمان عرف الکرامہ، خارجی صدیق اللہ داوڑ، خارجی غازی مداخیل، خارجی مقرب، خارجی قسمت اللہ، خارجی گلاب عرف دیوانہ، خارجی رحمانی، خارجی عادل، خارجی فضل الرحمان، خارجی عاشق اللہ عرف کوثر اور خارجی یونس شامل ہیں۔

سیکیورٹی ذرائع نے بتایا کہ ہلاک ہونے والا خارجی فضل الرحمان، خارجی گل بہادر کا قریبی رشتہ دار تھا۔ اس کارروائی کو پاکستان کے خلاف دہشتگرد سرگرمیوں میں ملوث خوارج کے خلاف ایک بڑی کامیابی قرار دیا جا رہا ہے۔

ترجمان کے مطابق گل بہادر گروپ پاکستان میں دہشتگردی کی متعدد وارداتوں میں ملوث رہا ہے اور افغانستان سے داخل ہو کر حملے کرتا رہا ہے۔ 17 اکتوبر کو شمالی وزیرستان کے علاقے خادی میں اسی گروپ نے ناکام VBIED حملہ کیا تھا، جس میں 3 خواتین، 2 بچے اور ایک جوان شہید ہوئے تھے۔

سیکیورٹی حکام کے مطابق پکتیکا میں کی گئی کارروائی کے نتیجے میں دہشتگرد نیٹ ورک کو شدید نقصان پہنچا ہے اور کئی اہم کمانڈر مارے جانے سے ان کی پاکستان مخالف سرگرمیاں مفلوج ہو گئی ہیں۔ پکتیکا میں پاکستانی حملوں میں مارے گئے دہشت گردوں کے نام سامنے آگئے