دونوں ہمسایہ ممالک ایک دوسرے کی خودمختاری کا احترام کریں گے،وزیر دفاع

دوحہ: وزیر دفاع خواجہ آصف نے تصدیق کی ہے کہ پاکستان اور افغانستان کے درمیان سیز فائر (جنگ بندی) معاہدہ طے پا گیا ہے۔

قطر میں جاری مذاکرات کے بعد ایکس (سابق ٹوئٹر) پر اپنے بیان میں خواجہ آصف نے کہا کہ پاکستان کی سرزمین پر افغانستان سے دہشت گردی کا سلسلہ فوری طور پر بند ہوگا۔ انہوں نے مزید کہا کہ دونوں ہمسایہ ممالک ایک دوسرے کی خودمختاری اور سرزمین کا احترام کریں گے۔

وزیر دفاع نے بتایا کہ 25 اکتوبر کو استنبول میں دونوں ممالک کے وفود کے درمیان ایک اور ملاقات ہوگی، جس میں معاہدے پر مزید پیش رفت اور تفصیلی امور پر بات چیت کی جائے گی۔

خواجہ آصف نے کہا کہ "ہم قطر اور ترکیے دونوں برادر ممالک کے تہہ دل سے شکر گزار ہیں، جنہوں نے اس عمل میں اہم کردار ادا کیا۔”

واضح رہے کہ گزشتہ روز قطری انٹیلی جنس چیف عبداللہ بن محمد الخلیفہ کی میزبانی میں مذاکرات کا پہلا دور دوحہ میں مکمل ہوا۔ پاکستانی وفد کی قیادت وزیر دفاع خواجہ آصف نے کی جبکہ سیکیورٹی حکام نے ان کی معاونت کی۔