پاکستان کا پہلا ہائپر اسپیکٹرل سیٹلائٹ خلا میں روانہ

کراچی:پاکستان نے خلائی تحقیق میں ایک اور اہم سنگِ میل عبور کرلیا، ملک کا پہلا ہائپر اسپیکٹرل سیٹلائٹ ایچ ایس-ون کامیابی کے ساتھ چین سے خلا میں روانہ کردیا گیا۔

سیٹلائٹ کی لانچنگ کے مناظر اسپارکو کے مرکزی دفتر میں براہِ راست دکھائے گئے، جہاں ماہرینِ فلکیات اور انجینئرز نے اس تاریخی لمحے کا مشاہدہ کیا۔

ترجمان اسپارکو کے مطابق یہ جدید ہائپر اسپیکٹرل سیٹلائٹ سیلاب، لینڈ سلائیڈز اور دیگر قدرتی آفات کی پیشگوئی میں مدد فراہم کرے گا۔ اس کے علاوہ یہ ماحولیاتی تبدیلیوں، زمینی خطرات اور وسائل کے مؤثر استعمال کے لیے بھی نہایت مفید ثابت ہوگا۔

مزید بتایا گیا کہ پاکستان کا یہ خلائی مشن قومی خلائی پالیسی اور وژن 2047 کا ایک اہم حصہ ہے۔ ایچ ایس-ون سیٹلائٹ انفراسٹرکچر میپنگ، شہری منصوبہ بندی اور قدرتی وسائل کے تجزیے کے لیے نئی راہیں کھولے گا۔

ترجمان کے مطابق یہ سیٹلائٹ رواں سال خلا میں بھیجا جانے والا تیسرا پاکستانی سیٹلائٹ ہے۔ اس سے قبل ای او-ون اور کے ایس-ون سیٹلائٹس کامیابی سے خلا میں بھیجے جاچکے ہیں اور دونوں اب بھی مکمل طور پر فعال ہیں۔

اسپارکو کے مطابق پاکستان کا خلائی پروگرام اب جدید ٹیکنالوجی اور ایپلی کیشنز کے ایک نئے دور میں داخل ہو چکا ہے، جو مستقبل میں سائنس، زراعت، ماحولیات اور دفاعی شعبوں میں اہم کردار ادا کرے گا۔