حماس پر قطر میں اسرائیلی حملے کے منصوبے کا علم نہیں تھا،امریکی ایلچی

واشنگٹن: امریکی ایلچی اسٹیو وٹکوف نے انکشاف کیا ہے کہ اسرائیل کی جانب سے قطر پر حملے کے بعد صدر ڈونلڈ ٹرمپ کو محسوس ہوا کہ اسرائیل قابو سے باہر ہو رہا ہے۔

غیر ملکی میڈیا کے مطابق مشرق وسطیٰ کے لیے امریکی ایلچی اسٹیو وٹکوف نے ایک انٹرویو میں بتایا کہ انہیں حماس پر قطر میں اسرائیلی حملے کے منصوبے کا علم نہیں تھا۔ اگلی صبح صدر ٹرمپ کی کال موصول ہوئی جب حملے کی خبر سامنے آئی۔

اسٹیو وٹکوف نے کہا کہ میں اور صدر ٹرمپ کے داماد جیرڈ کشنر خود کو دھوکہ کھایا ہوا محسوس کر رہے تھے۔ حملے کے بعد قطر کا اعتماد ختم ہو گیا، حماس زیر زمین چلی گئی اور رابطہ کرنا انتہائی مشکل ہو گیا۔

امریکی ایلچی کے مطابق، اسرائیل کی جانب سے قطر پر حملے کے بعد صدر ٹرمپ کو یہ لگا کہ اسرائیل قابو سے باہر ہو رہا ہے۔