1.2ارب ڈالرکی اگلی آئی ایم ایف قسط دسمبر تک متوقع،وزیر خزانہ کا اعلان

واشنگٹن: وزیر خزانہ محمد اورنگزیب نے اعلان کیا ہے کہ پاکستان کو اگلی آئی ایم ایف قسط کے طور پر 1.2 ارب ڈالر دسمبر تک موصول ہونے کی توقع ہے۔

وزیر خزانہ دورہ امریکا پر ہیں جہاں انہوں نے 20 وزارتی اجلاس میں شرکت کی اور لاس اینڈ ڈیمیج فنڈ کو فوری طور پر فعال کرنے پر زور دیا۔ اس موقع پر انہوں نے انٹرنیشنل فنانس کارپوریشن کے مینیجنگ ڈائریکٹر مختار ڈیوپ سے ملاقات کی اور ایگزِم بینک کی ریکوڈک منصوبے میں شمولیت کے امکانات پر بات کی۔

محمد اورنگزیب کی جے پی مورگن کے سینئر انتظامی وفد سے ملاقات میں دوطرفہ شراکت داری کو مزید فروغ دینے کی ضرورت پر زور دیا گیا۔

واشنگٹن میں پریس کانفرنس کرتے ہوئے وزیر خزانہ نے کہا کہ آئی ایم ایف ایگزیکٹو بورڈ جلد اجلاس میں معاہدے کی منظوری دے گا اور پاکستان کو 31 دسمبر تک 1.2 ارب ڈالر کی قسط موصول ہوگی۔

انہوں نے مزید کہا کہ آئی ایم ایف پاکستان پر قومی مفاد کے خلاف کوئی شرط عائد نہیں کر سکتا، اور موجودہ اصلاحات نے معیشت کو مستحکم کیا ہے۔ وزیر خزانہ نے بتایا کہ امریکا کے ساتھ تجارتی و ٹیرف معاہدہ ایک سے دو ہفتوں میں متوقع ہے، جبکہ حکومت نیویارک کے روزویلٹ ہوٹل کی نجکاری کے فیصلے کے قریب ہے۔