خیبر پختونخوا میں دہشت گردی کے خلاف پہلا پولیس اسنائپر اسکواڈ تیار

پشاور: خیبر پختونخوا میں بڑھتی ہوئی دہشت گردی کے پیش نظر پولیس نے اپنا پہلا اسنائپر اسکواڈ تیار کر لیا ہے۔

سینٹرل پولیس آفس پشاور کے مطابق اس اسکوڈ کو جدید تربیت اور جدید اسلحے سے لیس کیا گیا ہے۔ ہر اسکواڈ میں 10 اہلکار شامل ہوں گے اور انہیں دور فاصلے پر چھپے دشمن کو نشانہ بنانے کی تربیت دی گئی ہے۔

سی پی او پشاور کے مطابق یہ اسکواڈ پہاڑی وادیوں، سرحدی علاقوں اور جنوبی اضلاع میں تعینات ہوگا۔ سرد موسم میں انہیں جدید تھرمل امیجنگ ڈیوائسز بھی فراہم کی جائیں گی۔ ابتدائی طور پر اسنائپر اسکواڈ جنوبی اضلاع، ملاکنڈ ڈویژن اور سرحدی علاقوں میں فعال ہوگا۔

ایلیٹ فورس کے اسنائپر اسکواڈ کو تین ماہ کی جدید اسنائپر ٹریننگ دی گئی ہے تاکہ دہشت گردوں کے خلاف کارروائی میں زیادہ مؤثر ثابت ہو سکے۔