پی سی بی کا نوجوان کرکٹرز کے لیے اسکالرشپ معاہدہ

لاہور: پاکستان کرکٹ بورڈ (پی سی بی) نے ایک تعلیمی ادارے کے ساتھ کرکٹرز کے لیے تعلیمی اسکالرشپ کا معاہدہ کر لیا ہے۔ لاہور میں پی سی بی ہیڈ کوارٹر میں منعقد تقریب میں چیئرمین پی سی بی محسن نقوی، پاکستان وائٹ بال ٹیم کے ہیڈ کوچ مائیک ہیسن، ڈائریکٹر ڈومیسٹک کرکٹ عبداللہ خرم نیازی اور جی ایم ڈومیسٹک جنید ضیاء موجود تھے۔

معاہدے کے تحت ملک کے 16 ریجنز سے تعلق رکھنے والے انڈر 15، انڈر 17 اور انڈر 19 کیٹیگریز کے 120 نمایاں کھلاڑیوں کو مفت تعلیم دی جائے گی۔ یہ تعلیمی وظائف تین برس تک نافذ العمل رہیں گے۔

چیئرمین پی سی بی محسن نقوی نے نوجوان کھلاڑیوں کے لیے اسکالرشپ کی اہمیت اجاگر کرتے ہوئے کہا کہ اس اقدام سے کرکٹرز کھیل کے ساتھ تعلیم پر بھی توجہ دے سکیں گے۔ انہوں نے مزید کہا کہ معاہدہ مستقبل کے کرکٹ اسٹارز کی تعلیمی ضروریات کو پورا کرنے میں معاون ثابت ہوگا اور اسکالرشپ کے دائرہ کار کو مزید وسعت دی جائے گی۔