طورخم تجارتی گزرگاہ آٹھویں روز بھی بند، کاروبار اور آمدورفت متاثر

پاک افغان کشیدگی کے باعث طورخم تجارتی گزرگاہ آٹھویں روز بھی بند ہے، جس کے نتیجے میں ہزاروں کارگو گاڑیاں پھنس گئی ہیں اور دو طرفہ تجارت اور کاروباری سرگرمیاں مکمل طور پر معطل ہو گئی ہیں۔

پاکستان افغانستان کو سیمنٹ، ادویات، کپڑا، تازہ پھل، سبزیاں اور دیگر اشیاء برآمد کرتا ہے، جبکہ افغانستان سے پاکستان کو کوئلہ، سوپ اسٹون، خشک اور تازہ پھل اور دیگر اشیاء درآمد کی جاتی ہیں۔

سرحدی علاقے میں مال بردار گاڑیوں کی لمبی قطاریں لگ گئی ہیں اور کاروبار بند ہونے سے تاجروں اور ٹرانسپورٹرز کو روزانہ کروڑوں روپے کے نقصان کا سامنا ہے۔

کسٹم ذرائع کے مطابق طورخم گزرگاہ سے یومیہ اوسطاً 85 کروڑ روپے کی دوطرفہ تجارت ہوتی ہے، جس میں 58 کروڑ روپے کی ایکسپورٹ اور 25 کروڑ روپے کی درآمد شامل ہے۔ سکیورٹی ذرائع نے بتایا کہ اس بندش سے تجارتی نقصان اور معاشی مشکلات میں اضافہ ہو رہا ہے۔