پنجگور میں رکن اسمبلی کے بھائی قتل،کچھی میں لیویز تھانہ نذر آتش

بلوچستان کے ضلع پنجگور میں نامعلوم مسلح افراد کے حملے میں نیشنل پارٹی کے مرکزی رہنما اور رکن بلوچستان اسمبلی رحمت صالح بلوچ کے بھائی ولید صالح بلوچ جاں بحق ہوگئے۔

پولیس کے مطابق واقعہ پنجگور شہر میں اس وقت پیش آیا جب موٹرسائیکل سوار حملہ آوروں نے ولید صالح بلوچ کو گھر کے قریب نشانہ بنایا۔ انتظامیہ کے ایک اہلکار نے بتایا کہ وہ بازار سے گھر جا رہے تھے جب چار مسلح افراد نے ان پر فائرنگ کی جس سے وہ موقع پر جاں بحق ہوگئے۔

رپورٹس کے مطابق اس سے قبل بھی رحمت صالح بلوچ کے گھر پر دستی بم حملے ہو چکے ہیں۔ وزیراعلیٰ بلوچستان میر سرفراز بگٹی نے واقعے کی مذمت کرتے ہوئے ملزمان کی فوری گرفتاری کا حکم دے دیا ہے۔

ادھر ضلع کچھی کے علاقے حاجی شہر میں نامعلوم مسلح افراد نے لیویز فورس کے ایک تھانے پر حملہ کر کے اسے نذر آتش کر دیا۔ اہلکاروں کو یرغمال بنا کر ان سے اسلحہ چھین لیا گیا۔ ذرائع کے مطابق حملہ آور تقریباً بیس منٹ تک موقع پر موجود رہے اور بعد ازاں نامعلوم مقام کی جانب فرار ہو گئے۔

نیشنل پارٹی نے ولید صالح بلوچ کے قتل کی شدید مذمت کرتے ہوئے تین روزہ سوگ کا اعلان کیا ہے۔ پارٹی کے اعلامیے میں کہا گیا ہے کہ شادی کی تقریبات خوشی سے غم میں بدل گئیں، جبکہ حکومت شہریوں کے جان و مال کے تحفظ میں ناکام ہو چکی ہے۔ نیشنل پارٹی کے مطابق یہ حملہ امن، عدم تشدد اور سیاسی اقدار کے علمبردار خاندان پر کاری ضرب ہے۔