یمن،انصار اللہ کے ہاتھوں اقوام متحدہ کے 20 ملازمین گرفتار

صنعا: برطانوی خبر ایجنسی کے مطابق یمن میں حوثی تنظیم انصارُ اللہ نے اقوام متحدہ کے 20 ملازمین کو حراست میں لے لیا ہے، جن میں یونیسیف کے نمائندہ پیٹر ہاکنز بھی شامل ہیں۔

رپورٹ کے مطابق حوثی فورسز نے دارالحکومت صنعا میں اقوام متحدہ کے کمپاؤنڈ پر چھاپہ مار کر 5 مقامی اور 15 بین الاقوامی اہلکاروں کو حراست میں لیا۔

اقوام متحدہ کے نمائندے جین عالم نے تصدیق کی کہ حوثیوں نے ابتدائی تفتیش کے بعد 11 اہلکاروں کو رہا کر دیا ہے، جبکہ اقوام متحدہ اب بھی انصار اللہ اور دیگر فریقوں سے رابطے میں ہے تاکہ باقی اہلکاروں کی جلد رہائی ممکن بنائی جا سکے۔

ذرائع کے مطابق زیر حراست افراد ورلڈ فوڈ پروگرام (WFP)، یونیسیف (UNICEF)، اور دفتر برائے رابطہ انسانی امور (OCHA) سمیت مختلف اقوام متحدہ کی ایجنسیوں سے وابستہ ہیں۔

رپورٹ میں مزید کہا گیا کہ انصار اللہ کی جانب سے یہ پہلا واقعہ نہیں، اس سے قبل بھی اقوام متحدہ کے اہلکاروں کو حراست میں لیا جا چکا ہے۔ جنوری میں 8 اہلکاروں کی گرفتاری کے بعد یمن کے صوبہ سعدہ میں امدادی سرگرمیاں معطل کر دی گئی تھیں۔